Euskal Selekzioak Estoniara bidaiatuko du maiatzaren 23an

Argazkia: Ane Urkiri

Maiatzaren 23an Euskal Selekzioa berriro elkartuko da lagunarteko bat lehiatzeko. Kasu honetan Estonia izango dute arerio Tallingo TNTK Stadium-ean (Estonia). 2007an Argentinara bisita egin zutenetik, kanpoan jokatu gabe zeuden euskaldunak. Hala, urte beteko epean hirugarren lagunarteko neurketa antolatu du Euskal Futbol Federakuntzak. Eta 2016an Euskal Herrian “itzulerako partidua” jokatzeko hitzarmena egin dutela adierazi du jada. 

Erreginaren Kopa amaitu bezain laster adieraziko dituzte talde bakoitzaren deialdiak. Ekainean hasiko den Munduko Kopa tarteko, Jose Alvarez hautatzaileak ezin izango ditu aukeratu espainiar selekzioaren behin-betiko zerrendan egongo diren jokalari euskaldunak. 

Estonia 77. postuan kokaturik dago FIFA rankingean (historia guztian euskaldunen aurkari izan diren selekzio guztiak baino atzerago). Ekainean jokatuko den Kanadako Munduko Kopan ez du parte hartuko, ezin izan baitzuen emaitza onik atera sailkapen fasean; jokoan zeuden hogeita hamar puntutik zazpi eskuratu zituen. Bigarren multzo hura Espainia, Italia, Txekiar Errepublika, Errumania eta Mazedoniako Errepublikak osatu zuten eta estoniarrak azken bigarren postuan amaitu zuten. Gainera, gol zaparrada handiak jaso zituen espainiar (6-0 eta 0-5), italiar (1-5 eta 4-0), eta txekiarren aurka (6-0 eta 1-4) 2013tik 2014ra bitartean jokaturiko norgehiagoketan. 

Atzerago joanik, paper kaskarragoa jokatu zuen 2013ko Europar txapelketarako sailkapen fasean. Ez zuen punturik eskuratu Finlandia, Ukraina, Bielorrusia eta Eslovakiaren aurka. Beraz, Suediara bidaiatu gabe geratu ziren estoniarrak. 

Argazkia: Ane Urkiri

Euskal Selekzioaren aldetik, ez daukagu partidu ofizialetako erreferentziarik; bai, ordea, lagunarteko neurketetakoak. Katalunia eta Irlandar Errepublikaren aurkako norgehiagokak izan dira azkenak eta bietan maila polita erakutsi zuten euskaldunek. Kataluniarren aurka, joko teknikoa praktikatzea zaildu zuen euri jasak baldintzaturik, bana berdindu zuten, eta maiatzaren 10ean Azpeitian jokaturiko neurketan 2-0 gailendu ziren irlandarren aurka –Naiara Beristainen bi golei esker-. Beste garaipen bat ere zenbatu dezakegu 2010ean Euskal Herria Kirolak antolaturiko lagunartekoa kontuan hartuz gero; Anoetan 1-0 irabazi baitzuten Eslovakiaren aurka. Hasierako urteetan (2006 eta 2007an) Argentinaren aurka bi aldiz lehiatzean jasan zituzten historiako porrot bakarrak.

Albistea Euskal Futbol Federakuntzaren webgune ofizialean