Gurutze, Evelyn eta Leirek ez dute Errealean jarraituko

Oporretako lehenengo egunean Errealak taldean jarraituko ez duten jokalarien izenak ezagutzera eman ditu. Gurutze Del Ama, Evelyn Santos eta Leire Aizpuruk ez dute jarraituko talde txuri urdinean. . Hemendik taldearengatik egin duten lan ona eta esfortzua eskertu nahi diegu. 

Gurutze Del Ama eta Evelyn Santos taldea sortu zen urtean iritsi ziren, hau da, 2004-2005 denboraldian. Hala ere, bietako inork ez ditu denboraldi guztiak Errealean egin. Gurutzeren kasuan, Finlandiara joan zen ikasketak medio eta denboraldi bat baino gehiago galdu zituen. Evelynek, ordea, 2009-2010 denboraldian talde kataluniar batera joatea erabaki zuen. Nolanahi ere, bi beterana eta hasierako hamaikakoan ohikoak ziren jokalariak ziren.

Atezain eibartarra, Leire Aizpurua, otsailean batu zen talde donostiarrera Cris Cornejoren lesioarengatik. Hala ere, ezaguna zen talde txuri urdinarentzat, izan ere 2006-2007 eta 2007-2008 Errealean aritu zen.

Eskerrik asko eta zorte on!