Erreala izan da Aretxabaletako txapelketaren txapelduna

Erreala gaur goizean Aretxabaletan jokatu den txapelketa txapeldun aldarrikatu da. Txapelketan Eibar, Athletic B eta Debagoienako selekzioak parte hartu dute.

Ibarrako futbol zelaian jokatu den lehen partidua Eibar 1-0 gailendu zaio Debagoienako selekzioari. Baita penaltietan ere (2-1).

Argazkia: goiena.net

Ondoren talde txuri urdina eta txuri gorriaren txanda heldu da. Partidua berdindua izan da, baina Errealak partidua hobeto irakurtzen jakin du. Horrelaxe lortu du lehen gola, eta partiduko bakarra. Marinak defentsaren kanporaketa eskas bat aprobetxatu du baloia sare barrura sartzeko. Talde bizkaitarraren eraso batean Itxaso lesionatu da, baloiaren disputa batean, hain zuzen ere. Hasieran lesio larria zela zirudien, baina azkenean zaintiratu bat "besterik" ez da. Lehen baitlehen errekuperatzea espero dugu. Guru irten da beraren partez. Maialen Zelaiak, berak ongi dakien jokaldi bat egin du ia gola lortu duelarik. Lastima. Penaltietan talde txuri gorria gailendu da (1-3).

 Partidu honetako albiste ona Larra berriz ere futbol zelaian jokatzen ikusi dugula izan da, hilabete inguru lesionatuta egon ondoren.

Hirugarren partiduan Eibar eta Athletic aritu dira aurrez aurre. Eibar indartsu atera da zelaira eta aurre egin dio Athletic-eko harrobiari. Ez hori bakarri, partidua irabaztea lortu du 1-0, baita penaltitan ere (2-1).

Argazkia: goiena.net

Jarraian, eta deskantsatu ondoren, Errealaren txanda izan da. Oraingoan Debagoienako selekzioaren aurka. Atezain berri batek jokatu du, Cris aste osoan kanpoan egon baita ikastaro batean, Mariño taldekoa; zuzen eta adi aritu da. Egia esan, ez du lan askorik eduki. Errealak partidua menperatu du, baita markagailua ere. Eguzkiñe izan da lehena markagailua aurreratzen, 10. minutuan defentsatik ederki ihes egin ondoren. 3 minutu geroago Esty B.-k izugarrizko jokaldia egin du markagailuan 0-2koa jartzeko. Hirugarren eta partiduko azken gola Guruk lortu du, area kanpotik baloia ederki jaurti eta eskuadratik sartzean. Ederra. Eta izugarrizko detailea izan du Itxasori eskaintzean. 0-3, bai, baina gehiago izan zitezkeen. 0-2 zihoazenean, Gastek atezainaren aurrean bakarrik zegoela Uxueri eman dio baloia, honek jaurti eta atezainak geratu du. Jokalari azpeitiarra den Eguzkiñek bere hanketan eduki du gola, bere buruan hain zuzen ere. Penaltietan etxeko taldeak irabazi du (2-0).

Argazkia: goiena.net

Apenas deskantsatu gabe, baina ia talde guztia aldatuta, Errealak Eibarren aurka jokatu du. Partidu lehiatua eta parekatua. Horrelaxe islatu du markagailuak ere (1-1). Talde armagina aurreratu da talde txuri urdinaren atzelarien despiste bat aprobetxatuz, aurrelari eibartarra den Alana fin ibili da eta gola lortu du. Eibarrek partidua irabazi nahi zuen eta arazo asko sortu dizkio Errealeko atzelariei. Estik ia ia txartel gorria ikusi du. Baina zorte lagun izan du Errealak, eta Larrak atezain eibartarraren hutsegitea aprobetxatu du berdinketa lortzeko. Partidu amaitu baino lehen Idoiak jokaldi on bat egin du eta Uxuek ia gola sartu du.

Partidu hau jokatu aurretik gauza jakina zen finala ekipo armagina eta talde txuri urdinaren artean izango zela. Biek bi partidu irabazi zuten, Athletic B eta Debagoienako selekzioak, ostera, biak galdu zituzten. Berdintzean Eibar eta Erreala 7 punturekin jarri dira sailkapenean; ligaxkako azken partiduan berriz, Athletic B-k 1-0 irabazi dio Debagoienako selekzioari.

Finala jokatzea besterik ez zen geratzen. Errealak partidu guztia menperatu du, baina ez zuen gola aurkitzen. Asko kostatu zaie golarekin topo egitea. Uxueren jaurtiketa eder bat langara joan da, Eguzkiñek, berriz, aukera eder bat eduki du Marinak jaurtitako erdiraketa batean. Erreala baloia ukitu eta ukitu zebilen, baina ezer ez. Jarraitzaileok penaltiekin pentsatzen genbiltzan, eta jaurtiketa horiek nola joan diren ikusita bildurtuta geunden. Baina ez. Esty B-k, txapelketako partidu guztietan bere buruarekin oso ziur, lehen gola lortu du, 22. minutuan. Egia esanda oso ondo ematen zaio Aretxabaletako Ibarra futbol zelaia, beti sartu izan du golen bat. Gaur hiru, alajaina, finaleko 2-0ekoa ere berak sartu baitu erdiraketa bat errematatzean.

Errealak txapelketa haur irabazi egin behar zuen, eta halaxe egin du. Entrenatzaileak partidu guztietan jokalari desberdinak sartu ditu hamaikakoan, gutxien jokatzen dutenei aukera gehiago emanez. Oso ondo erantzun dute jokalari guztiek. Urtea ondo agurtu dute, zalantzarik gabe.

Sailkapena horrela geratu da:

1- Erreala

2- Eibar

3- Athletic B

4- Debagoienako selekzioa