Izenburuan porrot baten emaitza agertzen den arren, inoiz baino emaitz ederragoa da. Neskak Final Four-erako klasifikatu baitira!

Poliki-poliki baina neskak historia egiten ari dira, atzo ere lerro berri batzuk gehitu zizkioten euren historiari.

Partidu gaitza zela denok zekigun, neskak oso kontzentraturik irten ziren beroketak egitera. Bazekiten atzokoa orain arte jokatu duten partidu garrantzitsuena zela. Hori jakinda ondo ekin zioten partidari. Lehenengo zatian hainbat eraso egin zituzten baina asko ezin izan zuten amaitu. Aukera argiena korner batean heldu zen, ohikoa den bezala Lizasoren erremate batean, gutxigatik langaren gainetik joan zen.

Aurkariak ez ziren edonolakoak, hauek ere aukera garbiak izan baitzituzten, baina guk defensa eta atezain ikaragarriak ditugunez ezin izan zuten golik sartu. Hala ere, oso hurbil ibili ziren jokaldi baten, jaurtiketa Sokoak baloia behar adina ikutu eta langara bidali baitzuen.

Lehenengo zatia 0-0. Bigarrena hasi eta minutu gutxira, seigarren minutuan gaizki ez banabil, kataluniarren lehen gola iritsi zen jaurtiketa sendo batean. Gol arriskutsua. Aurkariak hazi egin ziren, etengabeko erasoan ibili ziren une askoan.

Une horretan Errealak bazekien gol bat sartu behar zutela. Zelaia beti bezela adi zebilen, eta bapatean defentsa eta atezainaren arteko ez ulertze batean Maialen inor baino argiago aritu zen eta baloia sareetara sartzea lortu zuen. Armailetan geundenok, Zelaia korrika ikusi arte ez ginen jabetu gola izan zenik. Imajina dezakezuen bezela izugarrizko poza piztu zen ekipo guztiaren eta errealzaleen artean.

Orain partidua lasaiago ikustea egokitzen zitzaigun. Halaxe izan zen Sant Gabrielek bigarren gola sartu zuen arte, baina jada beranduegi izan zen eta Erreala “txapeldun” irten zen partidu hontatik. Galdu eta hala ere txapeldun, ederra da hori!

Merezi izan zuen Bartzelonara partidu eder hau ikustera joatea, beti esaten dudan bezala neskek ez baitizute INOIZ huts egingo. Gainera giro ederra egon zen bertan, guztiok batera sufritu genuen baina guztiok batera ospatu genuen emaitz hori. Goiz ikaragarria bizi izan genuen!

Orain, ekainaren 17ra arte ez dute partidu ofizialik jokatuko, aurreko batean esan bezala, 19 urte azpiko selekzioak Europako Kopa jokatzen baitu maiatzaren 29tik ekainaren 11 arte, bertan Marina izango dugu. Zorte on Marina!

Ekipoko beste guztiek merezitako atsedenalditxo bat izango dute, indarrak hartu eta energia guztiz Final Four jokatzeko.

Ane Urkiri